KESI YA KATIBU MKUU WA MMFA KUSIKILIZWA TENA SEPTEMBA 15.

 

Na Merina Robert

Morogoro

KESI ya tuhuma ya kutoa rushwa ya chakula cha shilingi milioni moja kwa wajumbe wa mkutano mkuu wa chama cha soka manispaa ya Morogoro(MMFA) ili waweze kumchagua inayomkabili   katibu wa  chama hicho Kafale Maharagande inatarajia kuanza kusikilizwa Septemba kumi na tano mwaka huu baada ya taasisi ya Kuzuia na Kupambana na Rushwa(TAKUKURU) kuiambia mahakama ya hakimu mkazi mkoa wa Morogoro kwamba upelelezi umekamilika.

Kwa mujibu wa mwendesha mashitaka wa TAKUKURU mkoa wa Morogoro Cleoce Cleophace aliambia mahakama kuwa  mashihidi kumi na mbili wanatarajia kutoa ushahidi  kuhusiana na kesi hiyo  mahakamani hapo ambapo pia   vielelezo vinne vitawasilishwa .

Kafale  Maharagande anashitakiwa kwa tuhuma ya  kutoa rushwa Julai  ishirini na nne mwaka huu  katika ukumbi wa manispaa ya Morogoro akiwa mgombea wa nafasi ya Katibu wa MMFA kushawishi wajumbe wa mkutano mkuu wa chama hicho kwa  kutoa chakula cha shilingi milioni moja ili waweze kumchagua katika nafasi aliyokuwa akiigombe.

Akisoma shitaka  mbele ya hakimu mkazi wa Mkoa wa Morogoro Ivan Msaki ,mwendesha mashitaka wa Taasisi ya Kuzuia na Kupambana na Rushwa(TAKUKURU) mkoa wa Morogoro Cleonce Cleophace alidai kuwa  hatua ya mshitakiwa kutoa rushwa ya chakula  kwa wajumbe wa mkutano mkuu wa MMFA ni kinyume na kifungu cha  kumi na tano cha sharia ya Kuzuia na Kupambana na rushwa  ya mwaka elfu mbili na saba.

Hata hivyo mshitakiwa alikana shitaka lenye vipengele tisa ambavyo kati ya hivyo nane alivikubali huku kipengele kimoja akikana na kwamba mshitakiwa yupo nje kwa dhamana hadi Septembe kumi na tano kesi hiyo itakapoanza kusikilizwa.